«Այբ» դպրոցի նախագծային ուսումնառության «Մուլտիմեդիա» ակումբի «Սիրո մի կյանք. Շառլ Ազնավուր» ֆիլմը ցուցադրվեց նաև «Այբ» դպրոցում` հնարավորություն տալով «Այբ» համայնքին և ընկերներին վայելելու այբեցիների ստեղծած նախագիծը։
Հանդիսատեսն առիթ ունեցավ բացահայտելու մեծ շանսոնիեի կյանքն ու կարիերան՝ անցնելով նրա կյանքի հայտնի և անհայտ ճանապարհներով։ Ֆիլմից ստացված տպավորություններն ու հույզերը ոգևորիչ էին նաև այստեղ։
Ֆիլմը մեծ ներդրում ունի ազնավուրյան ժառանգության պահպանման գործում՝ հնարավորություն տալով ծանոթանալու նրա հանճարին ու միշտ արդիական կերպարին։ Այն մեծ շանսոնիեի կյանքի արտահայտությունն է, որը բացահայտում է Ազնավուրի կերպարի բազմաշերտությունը՝ մարդասիրությունից մինչև հայրենասիրություն։
Ֆիլմադիտումից հետո հանդիսատեսին ներկայացվեց նաև երիտասարդ ստեղծագործողների պատրաստած կարճ տեսանյութը, որն ամփոփեց աշակերտների ամիսներ շարունակ կատարած աշխատանքը։ Միջոցառմանը ներկա էին նաև ֆիլմի և Ազնավուրի հետ կապ ունեցող հյուրեր, որոնք արտահայտեցին իրենց կարծիքը ֆիլմի և նրա կարևորության մասին։ Օրվա հյուրերից էին «Ազնավուր» հիմնադրամի ներկայացուցիչները, որոնք գրքեր նվիրեցին ֆիլմի ստեղծագործական խմբին։
«Սիրո մի կյանք» ֆիլմը մեծ էկրան էր բարձրացվել «Ռոլան» միջազգային մանկապատանեկան փառատոնում՝ արժանանալով «Երեխաները երեխաների համար» անվանակարգի: Ցուցադրություններ էին տեղի ունեցել նաև Լոռու, Շիրակի, Տավուշի մարզերում, ինչպես նաև սփյուռքում։
Այսպես ներկայացվեցին Շառլ Ազնավուրի բազմաշերտ կերպարն ու նրա անմահ ժառանգությունը։ Այս նախագիծը կդառնա ուսանելի և ոգեշնչող՝ ապագա սերունդների համար։
Մարիամ Բաղդասարյան
11-րդ դասարան