Ընդունելություն «Այբ» տարրական դպրոց

Գրանցվել և մասնակցել բաց դռների օրերի միջոցառումներին: Բաց դռների միջոցառումն իրականացվելու է առկա կամ առցանց՝ ZOOM հարթակի միջոցով։ Հանդիպմանն անհրաժեշտ է գրանցվել կայքում, որից հետո դիմորդների հետ կապ կհաստատվի մանրամասները ներկայացնելու համար։

Բաց դռներին մասնակցությունը բոլոր դիմորդների ծնողների համար պարտադիր է։ Դիմումը ներկայացրած, սակայն բաց դռների միջոցառմանը չմասնակցած ծնողների երեխաները չեն կարող մասնակցել ընդունելությանը:

Բաց դռների միջոցառումները միջինում տևում են մոտ 3 ժամ։

Ներկայացնել ընդունելության հայտը: Դիմորդների ծնողները դպրոցի կայքից լրացնում և ուղարկում են տարրական դպրոցի ընդունելության դիմումի ձևը: Էլեկտրոնային դիմումը լրացնելը պարտադիր է ընդունելության գործընթացին մասնակցելու համար։ Տպագիր դիմումը՝ ներքոնշյալ փաստաթղթերով, անհրաժեշտ կլինի ներկայացնել դպրոցի սահմանած ժամկետներում։

• Դիմորդի 3x4 չափսի մեկ լուսանկար
• Դիմորդի ծննդյան վկայականի պատճեն
• Դիմորդի և ծնողների ՀԾՀ համարները
• Դիմորդի բժշկական քարտը՝ նախկին 26 ձևը
• Բնակչության պետական ռեգիստրում դիմորդի հաշվառված լինելու մասին տեղեկանք
• Երկու ծնողների անձնագրերի պատճենները․ ներկայացվում են կամ նույնականացման քարտ և բնակչության պետական ռեգիստրում հաշվառված լինելու մասին տեղեկանք, կամ անձնագրի (ոչ բիոմետրիկ) առաջին և երկրորդ էջերի պատճենները, որոնք պետք է ներկայացնել «Այբ» դպրոց՝ Թբիլիսյան խճ․ 11/11 հասցեով:

Առանց էլեկտրոնային դիմումի տպագիր դիմումը չի ընդունվում. առանց տպագիր դիմումի և կից փաստաթղթերի էլեկտրոնային դիմումն անվավեր է: Էլեկտրոնային դիմումները լրացվում և ուղարկվում են առցանց:

Դիմումների մեջ առկա է համապատասխան ուսումնական տարվա ուսման արժեքի, պայմանագրերի կնքման և վճարումների կատարման վերջնաժամկետների վերաբերյալ տեղեկույթ: Դիմումը ստորագրելով՝ դիմորդի օրինական ներկայացուցիչը հավաստում է, որ տեղյակ է այդ պայմաններին և համաձայն դրանց:

Դիմորդի ծնողը / օրինական ներկայացուցիչը պատասխանատվություն է կրում դիմումի ձևում ներկայացված ցանկացած տեղեկության ճշմարտացիության ու ճշգրտության համար: Դպրոցում ուսումնառության ժամանակ ցանկացած պահի, եթե պարզվի, որ դիմումի ձևում ներկայացված տեղեկությունները չեն համապատասխանել իրականությանը, դպրոցը կարող է միակողմանի լուծել «Ուսումնառության մասին» պայմանագիրը և դադարեցնել աշակերտի ուսումը դպրոցում՝ դրա մասին գրավոր տեղեկացնելով մյուս կողմին:

Դիմումի հետ կարող են ներկայացվել նաև դիմորդին և/կամ ընտանիքին վերաբերող երաշխավորագրեր՝ ստորագրված երաշխավորի կողմից։ Երաշխավորագիր ունենալը պարատադիր չէ և այն ունենալու փաստը որևէ առավելություն որևէ դիմորդի/ընտանիքի չի տալիս: Երաշխավորագիրը դիտարկվում է որպես հավելյալ տեղեկատվություն դիմորդի և/կամ ընտանիքի վերաբերյալ, որին ծանոթանում է Ընդունող հանձնաժողովը դիմորդի հետ անհատական հանդիպման փուլում։

Մասնակցել ընդունելության 1-ին փուլին` դիմորդի հետ հանդիպում-դասերին: Հանդիպումներն իրականացվելու են առկա ձևաչափով՝ «Այբ» դպրոցում։ Մասնակցության մանրամասները ներկայացվում են դիմորդներին մինչ հանդիպում-դասերը։ Հանդիպումները չեն համարվում երեխայի գիտելիքների ստուգում և չեն կարող դիտարկվել որպես այդպիսին:

Հանդիպումները իրականանում են երկու փուլով՝ անհատական և խմբային։ Անհատական հանդիպում․ պարտադիր է բոլոր դիմորդների համար։ Այս փուլի արդյունքների ԸՀ-ն սահմանում է հաջորդ փուլերի մասնակիցների ցանկը։ ԸՀ-ի սահմանած ցանկում չընդգրկված դիմորդների համար ընդունելության գործընթացը այդ պահին ավարտվում է։

Խմբային հանդիպումներ․պարտադիր են այս փուլ անցած բոլոր դիմորդների համար: Բաղակացած են երկու գնահատվող մասից, որոնք անցկացվում են երկու օրվա ընթացքում:

Յուրաքանչյուր օրվա հանդիպման տևողությունը առավելագույնը 2 ժամ է: Դիմորդներին տրվում են տրամաբանական թեստային հանձնարարություններ և խաղային առաջադրանքներ, որոնք օգնում են բացահայտել երեխայի ընդհանուր պատրաստվածությունը դպրոցին և, թե ինչ փոխհարաբերություններ նա կարող է ունենալ իր հասակակիցների հետ: Հանդիպումները վարում են դասվարները, տարրական դպրոցի մանկավարժները և հոգեբանները: Հանդիպումների արդյունքում նրանք ներկայացնում են յուրաքանչյուր դիմորդի վերաբերյալ ամփոփ տեղեկույթ:

Մասնակցել ընդունելության 2-րդ փուլին` դիմորդի ծնողների հետ հարցազրույցին:

Այս փուլը նախատեսված է այն ծնողների համար, որոնց երեխաները անցել են խմբային հանդիպումների փուլ՝ ըստ ԸՀ-ի սահմանած ցանկի և նրանց համար, ովքեր չունեն այդ պահին «Այբ» հիմնական դպրոցում սովորող երեխա։

Մեկ զրույցի տևողությունը մինչև 30 րոպե է: Ծնող(ներ)ը զրույցին ներկայանում է(են) հստակ ժամանակացույցով, որի մասին նախօրոք հաղորդվում է էլ. նամակի միջոցով:

Զրույցին պետք է ներկա լինեն երկու ծնողները (եթե չկան բացակայության խիստ հիմնավոր պատճառներ):

Զրույցն անցկացնում են ընդունող հանձնաժողովի անդամները, որի ընթացքում նրանք ծանոթանում են ծնողների հետ, փորձում պարզել «Այբ» դպրոցն ընտրելու պատճառը, հասկանալ «Այբ» համայնքին` ծնողների միանալու հնարավորությունը, ընդհանուր արժեհամակարգը և այլն: Սա պարզապես հանդիպում-զրույց է անմիջական ու անկաշկանդ միջավայրում:

Հաշվի առնելով ընդունելության երկու փուլերի արդյունքները՝ ընդունող հանձնաժողովը վերջնական որոշում է կայացնում երեխայի՝ դպրոց ընդունվելու վերաբերյալ:

Ծնողների հետ զրույցները անցկացվում են առկա ձևաչափով, խիստ հիմնավոր պատճառների դեպքում կարող են անցկացվել նաև առցանց։