Նոյեմբերի 20-ին «Այբ» դպրոցը հյուրընկալեց Մոսկվայի ժողտնտեսության և պետական ծառայության ազգային լիցեյի գիտական գծով տնօրեն Անտոն Մոլևին, լիցեյի տնօրեն Ժաննա Պոդկովիրկինային և փոխտնօրեն Բորիս Պիվովարին։
Նորաբաց լիցեյի ղեկավարությանը հետաքրքրում էին «Այբ» դպրոցի անցած ուղին և կուտակած փորձը։ «Այբ»-ի գործադիր տնօրեն Արամ Փախչանյանը հյուրերին մանրակրկիտ ներկայացրեց դպրոցը, նրա ստեղծման պատմությունն ու անցած ուղին։ Հատկապես մեծ հետաքրքրություն առաջացրին «Այբ»-ում ներդրված նախագծային ուսումնառությունը, գնահատման մեխանիզմները, դասավանդման մոտեցումները։
Լիցեյի ղեկավարներից Անտոն Մոլևը հետաքրքրված էր հետագա գործակցության հնարավորությամբ՝ հաշվի առնելով նաև, որ պրն Մոլևը զբաղեցնում է Մոսկվայի քաղաքային դումայի կրթության հարցերով հանձնաժողովի փոխնախագահի պաշտոնը ևս։
Տպավորված կարճ ժամանակում «Այբ»-ի կուտակած հարուստ փորձով՝ հյուրերը նաև հրավիրեցին դպրոցի տնօրինությանը փոխադարձ այցով հյուրընկալվելու Մոսկվայի նորաբաց լիցեյում՝ տեղում քննարկելու հետագա համագործակցության շրջանակները։