«Այբ» դպրոցի «Ռոքեստր» նախագծային ակումբի և «Կերոն» զարգացման հիմնադրամի համագործակցության արդյունքում կայացավ նոր ձևաչափով և անկրկնելի համերգ՝ Երևանի մետրոյի «Երիտասարդական» կայարանում։
«Ռոքեստր» նախագծային ակումբը սեպտեմբերից միավորել է որակյալ երաժշտություն սիրող, տաղանդաշատ, ստեղծագործ ու աշխատասեր աշակերտների։ Մենք դարձել ենք մի մեծ ընտանիք և միասին սկսել աշխատել մեկ ընդհանուր նպատակի շուրջ՝ օգնելու մարդկանց հասկանալու երաժշտական լեզուն և երաժշտությունը լսելու մտածված ու պատասխանատվությամբ։ Տարվա սկզբում ծրագրում էինք, բացի մեր հավատարիմ հանդիսատեսի կողմից սպասված մեծ եզրափակիչ համերգից, ունենալ նաև մի քանի փոքր համերգներ, որոնք մեզ, և հատկապես ակումբին նոր միացած աշակերտներին, կօգնեին ավելի ինքնավստահ հանդես գալու բեմում ու տարբեր լսարանների հետ կապ հաստատելու։ Սակայն «Կերոն» զարգացման հիմնադրամի հետ համագործակցությունը մեզ համար լիովին անսպասելի էր։
«Կերոն» զարգացման հիմնադրամի նախաձեռնած «Երաժշտական մետրո» նախագծի շրջանակում մեր համերգը տեղի ունեցավ «Երիտասարդական» կայարանում՝ յուրահատուկ ու նախադեպը չունեցող ձևաչափով։ Ծանր ու բազմազան գործիքները մետրոյի տարածք հասցնելը իսկական մարտահրավեր էր. «Ռոքեստրի» աշակերտների համար նույնիսկ առանձին շարժասանդուղք էր նախատեսվել, որը միացվում էր միայն հատուկ հրահանգով։
Համերգի ընթացքում հնչեցին բոլոր ժամանակների սիրված ռոք խմբերի երգեր, այդ թվում` The Beatles, Deep Purple, «Լավ էլի» խմբերի կատարումները։ Համերգի թնդացող հնչյուններն անտարբեր չթողեցին թե՛ մետրոյով ուղևորվողներին, թե՛ մեզ՝ ակումբի աշակերտներիս աջակցելու եկած այբեցիներին, ովքեր ողջ ընթացքում ձայնակցում էին մեզ և վայելում իրենց սիրելի երգերը։ Մեզ հետ երեկոն կիսում էին նաև բազմաթիվ օտարերկրացի զբոսաշրջիկներ, որոնք ակումբի մասին իմացել էին սոցիալական ցանցերից։
Այս համերգն ակումբի նոր կազմի համար առաջինն էր, ինչի պատճառով մեզ մոտ կար փոքր-ինչ լարվածություն, սակայն դա գրեթե չազդեց կատարումների որակի վրա։
Շնորհակալ ենք այս բացառիկ փորձառության, անկրկնելի հույզերի ու աջակցության համար։ Մեզ համար յուրաքանչյուր նոր բեմ նոր հնարավորություն է՝ մեր քրտնաջան աշխատանքի արդյունքում ստեղծած երաժշտությունը ներկայացնելու հանդիսատեսին։ Իսկ սա դեռ սկիզբն է։
Նարե Մովսիսյան, Աննա Դանիելյան
11-րդ դասարան