Նոր սերնդի մեջ սերմանելով «կանաչ» սովորություններ՝ փոխել վատնողական մտածողությունը մոլորակի նկատմամբ․ այս գլխավոր նպատակով է «Այբ» ավագ դպրոցում մեկնարկել բնապահպանական նոր առցանց դասընթաց։ Այն ստեղծվել է Climate Uturn֊ի կողմից, որը կայուն զարգացման և իրազեկման մակարդակի բարձրացման հարթակ է և մեկնարկել է 2 տարի առաջ IDeA հիմնադրամի օգնությամբ։
Ծրագրի փորձնական փուլին մասնակցում է «Այբ» ավագ դպրոցի ութ աշակերտ։ Նրանք երկու շաբաթ տևողությամբ դասընթացի արդյունքում իրականացնելու են սննդի էկոկայունության թեմայով բնապահպանական նախագիծ։ Առցանց դասընթացը վարում է Climate Uturn հարթակի ղեկավար Դիանա Բադեյանը։
Ապագա առաջնորդների ծրագրի նպատակն է դպրոցականներին ծանոթացնել էկոլոգիապես կայուն նախագծերի ամենալավ ու հետաքրքիր գաղափարներին և օգնել նրանց իրագործելու սեփական նախագծերն ու դարձնելու դպրոցն էկոլոգիապես ավելի կայուն։ Նախագծի շրջանակում աշակերտները ստանալու են գիտելիք և տեղեկույթ շրջակա միջավայրի խնդիրների վերաբերյալ (քաղաքներ, էներգիա, օվկիանոսներ, ուտելիք, հագուստ)։
Կիսվել